Увечары 25 сьнежня камэры Беларускай мэтэарытнай сеткі зафіксавалі супэрбалід. Ён праляцеў над Менскам і ўпаў каля Смалявічаў у выглядзе мэтэарытаў, піша тэлеграм-канал Менскага плянэтарыю.
Агульную масу частак, якія выпалі, ацэньваюць у некалькі кіляграмаў.
«Фрагмэнты мэтэарыта, як мяркуецца, выпалі па лініі вёсак Рабы Слуп, Прысынак, Калюга, Чорны Лес і Высокія Ляды. Жыхарам гэтых населеных пунктаў просьба зважаць на незвычайныя камяні розных памераў, якія ляжаць на паверхні. Мэтэарыт можа мець чорную абвугленую скарынку з расколінамі і сколамі, чорную аплаўленую матавую паверхню або ржава-буры колер», — сказана ў канале плянэтарыю.
19 студзеня валянтэры арганізавалі першыя пошукі. Мэтэарыт, як паведамляюць у плянэтарыі, «мае важнае значэньне для беларускай навукі».
Людзей, якія знайшлі камяні, якія адпавядаюць апісаньню, просяць скідаць на пошту фатаздымкі, адрас planetarium1965@gmail.com.
ГЛЯДЗІЦЕ ТАКСАМА: Вяртаньне на Месяц, скафандры ад Prada і інавацыі SpaceX. Што адбывалася ў сфэры касьмічных палётаў і дасьледаваньняў у 2024-м