У Літве папярэдзілі пра фальшыўку аб нібыта падрыхтоўцы літоўскай выведкай ваенізаваных груп беларусаў

У Дэпартамэнце дзяржаўнай бясьпекі (ДДБ) Літвы папярэдзілі аб распаўсюдзе фальшывага дакумэнту, у якім сьцьвярджаюць, што літоўская выведка нібыта рыхтуе ваенізаваныя групы беларусаў.

«Апублікаваны ў сацыяльнай сетцы Facebook уяўны дакумэнт ДДБ аб дзейнасьці выведкі ў падрыхтоўцы ваенізаваных беларускіх фармаваньняў зьяўляецца фальшыўкай, якая ня мае нічога агульнага з рэальнай дзейнасьцю ДДБ і павінна разглядацца як частка інфармацыйнай кампаніі, накіраванай супраць Літвы», — паведамляецца на старонцы ДДБ Літвы ў Facebook.

У ДДБ адзначылі, што з набліжэньнем выбараў у Беларусі гэтая кампанія яшчэ больш актывізавалася.

Як паведаміла выданьне LRT, у распаўсюджаным дакумэнце паведамляецца, што ведамства нібыта ўхваліла рашэньне аб «стварэньні падкантрольнага вайскова-патрыятычнага клюбу «Літвіны», указваюцца характарыстыкі яго сяброў і адзначаецца недастатковая падрыхтаванасьць клюбу да «разьвіцьця актыўных дзеяньняў датычна Беларусі». У дакумэнце шмат артаграфічных памылак.

Выбары прэзыдэнта ў Беларусі адбудуцца 26 студзеня. Падрыхтоўка і арганізацыя выбараў адбываюцца ва ўмовах палітычнага крызісу, шырокамаштабных рэпрэсій і, паводле міжнародных арганізацый, носяць несвабодны і недэмакратычны характар.