Калас прызнала рацыю Трампа ў заявах аб малым выдзяленьні Эўразьвязам сродкаў на абарону

Заява Калас прагучала ў прамове на штогадовай канфэрэнцыі Эўрапейскага абароннага агенцтва:

«Летась краіны – сябры ЭЗ у сярэднім выдаткавалі 1,9% ВУП на абарону. Расея выдаткоўвае 9%. Мы ўкладваем мільярды ў нашы школы, сацыяльнае забесьпячэньне, ахову здароўя. Але калі мы ня будзем больш інвэставаць у абарону, усё гэта апынецца пад пагрозай», — заявіла кіраўніца замежнай палітыкі Эўразьвязу Кая Калас падчас прамовы на штогадовай канфэрэнцыі Эўрапейскага абароннага агенцтва (EDA).

Нежаданьне Эўропы ўкладвацца ў вайсковыя магчымасьці таксама падае небясьпечны сыгнал агрэсару, адзначыла Калас.

«Слабасьць іх прыцягвае. Прэзыдэнт Трамп мае рацыю, калі кажа, што мы трацім недастаткова. Час інвэставаць. Нам патрэбны ўкладаньні ад дзяржаў-сяброў і прыватнага сэктару, а таксама з агульнага эўрапейскага бюджэту», — заявіла Калас.

Кая Калас на пасяджэньні Эўрапейскага абароннага агенцтва ў Бруселі таксама заявіла, што многія з нацыянальных спэцслужбаў даюць інфармацыю аб тым, што Расея можа праверыць гатоўнасьць ЭЗ абараняцца праз тры-пяць гадоў:

«Расея — праблема не для некаторых, а для ўсіх нас. Эўрапейцы павінны прачнуцца»,— заклікала яна.

9 студзеня на сустрэчы на амэрыканскай базе ў нямецкім Рамштайне міністры абароны краінаў NATO абмеркавалі прапанову абранага прэзыдэнта ЗША Дональда Трампа павысіць выдаткі на абарону да 5%.

«Эўропа дае мізэрную доля грошай у параўнаньні з тым, што выдаткоўваем мы. Паміж намі ёсьць рэч, якая называецца акіянам, праўда? Чаму мы даём на мільярды і мільярды даляраў больш грошай, чым Эўропа?» — казаў раней Дональд Трамп.

На гэты момант выдаткі ЗША складаюць 60% агульных выдаткаў NATO.

Падчас пасяджэньня Кантактнай групы па абароне Ўкраіны міністры заявілі, што здольнасьць краінаў NATO выконваць пастаўленыя абаронныя задачы важнейшая за выдаткі адносна ВУП. У прыватнасьці, міністар абароны Нямеччыны Борыс Пісторыюс адзначыў, што лічбы ня маюць вялікай важнасьці.