Лінкі ўнівэрсальнага доступу

ХАМАС вызваліў 13 ізраільскіх закладнікаў і 12 тайляндцаў


Сьцяна са здымкамі закладнікаў у Ізраілі.
Сьцяна са здымкамі закладнікаў у Ізраілі.

Радыкальная палестынская групоўка ХАМАС, прызнаная тэрарыстычнай у ЗША і ЭЗ, пачала перадаваць ізраільскім вайскоўцам закладнікаў, якія былі вывезеныя ў сэктар Газа пасьля нападу на поўдзень Ізраілю 7 кастрычніка.

Першымі вызвалілі 12 грамадзян Тайлянду, якія прыехалі ў Ізраіль на сэзонныя працы. Прэм’ер-міністар Тайлянду пацьвердзіў факт іх вызваленьня.

Усьлед за імі супрацоўнікам Чырвонага Крыжа ў сэктары Газа перадалі 13 ізраільцян — жанчын і дзяцей. Чырвоны Крыж перадасьць іх ізраільскім вайскоўцам.

Закладнікаў выпускаюць праз КПП Рафах на мяжы сэктару Газа і Эгіпту. Іх сустракаюць вайскоўцы Арміі абароны Ізраілю, а таксама лекары і псыхолягі. Адтуль вызваленых даставяць верталётамі на вайсковую авіябазу Хацэрым на поўдні Ізраілю, а потым у шпіталі. Там яны сустрэнуцца зь сем’ямі і прабудуць пад мэдычным наглядам як мінімум двое сутак, паведамляе Haaretz. СМІ паказваюць сталы зь ежай і вадой, дзіцячымі цацкамі, а таксама шумапаглынальнымі навушнікамі для палёту.

У абмен на 13 сваіх закладнікаў Ізраіль сёньня перадасьць прадстаўнікам ХАМАСу 39 палестынцаў, якія адбывалі пакараньне ў ізраільскіх турмах. Іх вызвалілі сёньня з турмы Офэр на Заходнім беразе ракі Ярдан і прывезьлі на аўтобусе Чырвонага Крыжа да мяжы з Газай.

Часовая паўза ў ваенных дзеяньнях пачалася ў пятніцу і працягнецца да вечара аўторка. ХАМАС абавязаўся за чатыры дні вызваліць 50 закладнікаў, захопленых на поўдні Ізраілю падчас нападаў 7 кастрычніка. Такім чынам, колькасьць закладнікаў, якія застаюцца ў Газе, скароціцца да 190. Ізраіль, са свайго боку, перадасьць ХАМАСу 150 палестынцаў, якія адбываюць турэмнае пакараньне — таксама жанчын і непаўналетніх.

Дамоўленасьць аб часовым спыненьні агню паміж Ізраілем і ХАМАСам была дасягнутая пры пасярэдніцтве Катара, Эгіпту і ЗША. Цягам чатырохдзённай паўзы ў сэктар Газа будзе дастаўляцца гуманітарная дапамога. Штодзень плянуецца адпраўляць 130 тысяч літраў дызэльнага паліва і 200 грузавікоў з гуманітарнымі грузамі.

  • Падчас нападаў баевікоў ХАМАСу на Ізраіль 7 кастрычніка былі забітыя больш за 1200 ізраільцян, пераважная большасьць зь іх — мірныя жыхары. Каля 240 чалавек, сярод якіх грамадзяне многіх дзяржаў, былі ўзятыя ў закладнікі.
  • Падкантрольнае ХАМАСу Міністэрства аховы здароўя Газы сьцьвярджае, што з 7 кастрычніка падчас апэрацыі ў адказ ізраільскай арміі ў сэктары загінулі больш за 14 тысяч чалавек, большасьць зь якіх — жанчыны і дзеці. Незалежных пацьверджаньняў гэтых зьвестак няма.
  • Ізраіль пачаў наземную апэрацыю ў Газе і цяпер кантралюе частку паўночнага раёну сэктару, у тым ліку шэраг кварталаў гораду Газа і марское ўзьбярэжжа.

Вайна Ізраілю з ХАМАСам. Асноўнае

  • 7 кастрычніка 2023 году Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня менш за 260 удзельнікаў музычнага фэстывалю і захапіўшы сотні закладнікаў. Некаторых людзей расстрэльвалі проста на вуліцах.
  • Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
  • Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
  • ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
  • Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАС. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
  • Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
  • 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
  • Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
  • Лібанская ўзброеная групоўка «Хэзбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
  • Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
  • Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
  • 22 лістапада стала вядома, што Ізраіль і ХАМАС у Катары падпісалі пагадненьне аб замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
  • За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
  • 6 студзеня Ізраіль заявіў пра тое, што поўнач сэктару Газа зачышчаная ад баевікоў ХАМАС.

    «Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.

    «Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША.
  • Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
  • 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
  • 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
  • 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
  • 15 студзеня 2025 году стала вядома пра пагадненьне пра спыненьне агню паміж Ізраілем і ХАМАС, якое павінна пачаць дзейнічаць з 19 студзеня. Ізраільскі бок выпусьціць некалькіх зьняволеных палестынскіх арабаў, а тэрарыстычная групоўка ізраільскіх закладнікаў.

    Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG