Армія абароны Ізраілю за дзень атакавала ў сэктары Газа больш за 450 цэляў з сушы, паветра і мора. У ЗША занепакоеныя тым, што ў палестынскім анкляве, насуперак абяцаньням Ерусаліму, па-ранейшаму масава гінуць мірныя жыхары, піша Голас Амэрыкі.
Армія Ізраілю паведаміла аб нанясеньні ўдараў па 450 цэлях у сэктары Газа за апошнія содні: гэта найвышэйшы паказьнік з 1 сьнежня, калі завяршыўся рэжым спыненьня агню і аднавіліся баявыя дзеяньні, паведамляе Reuters. Баі сталі больш жорсткімі як на поўначы, так і на поўдні.
Паводле міністэрства аховы здароўя сэктару Газа, падкантрольнага ХАМАС, ахвярамі ваеннай апэрацыі ў чацьвер сталі 350 чалавек. Усяго, паводле інфармацыі мясцовых уладаў, за апошнія два месяцы загінулі звыш 17 тысяч жыхароў Газы.
«З моманту аднаўленьня ваеннай кампаніі на поўдні прайшоў тыдзень, і па-ранейшаму вельмі важна, каб Ізраіль надаваў асаблівую ўвагу абароне цывільнага насельніцтва, — заявіў дзяржаўны сакратар ЗША Энтані Блінкен. — Мы бачым разыходжаньне паміж намерам абараніць цывільнае насельніцтва і фактычнымі вынікамі».
ХАМАС паведаміў, што найбольш лютыя баі ідуць у раёне Шуджая на поўначы сэктару і ў Хан-Юнісе на поўдні, які лічыцца другім найбуйнейшым горадам сэктару.
Ізраіль заклікаў жыхароў пакінуць гарады Джэбалія і Зэйтун на поўначы і раёны Шуджая і Стары горад у сталіцы анкляву. ЦАХАЛ рэкамэндуе мірнаму насельніцтву адыходзіць з поўначы ўздоўж берагу, бо ранейшы маршрут на поўдзень стаў «полем бітвы».
Праваабаронцы паведамляюць аб пагаршэньні гуманітарнай сытуацыі. «Парадак у сэктары Газы парушаны. На вуліцах бясчынствы, асабліва пасьля надыходу цемры, — напісаў у сацыяльнай сетцы X дырэктар Блізкаўсходняга агенцтва ААН для дапамогі палестынскім уцекачам у сэктары Газа Том Уайт. — Некаторыя канвоі з гуманітарнай дапамогай рабуюць, а транспартныя сродкі ААН закідваюць камянямі. Грамадзтва на мяжы поўнага краху».
Эўра-Міжземнаморская арганізацыя маніторынгу правоў чалавека апублікавала фатаграфіі з пашкоджанай сярэднявечнай Вялікай мячэцьцю ў Газе. Пра нанесеную ёй шкоду стала вядома ўпершыню. У Ізраілі гэта не пракамэнтавалі.
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня менш за 260 удзельнікаў музычнага фэстывалю і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАС. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хэзбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне аб замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач сэктару Газа зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
- 15 студзеня 2025 году стала вядома пра пагадненьне пра спыненьне агню паміж Ізраілем і ХАМАС, якое павінна пачаць дзейнічаць з 19 студзеня. Ізраільскі бок выпусьціць некалькіх зьняволеных палестынскіх арабаў, а тэрарыстычная групоўка ізраільскіх закладнікаў.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
