Незадоўга да гэтага прадстаўнікі адміністрацыі папярэдзілі, што вайна паміж Ізраілем і ХАМАС можа абвастрыцца.
Ізраіль вядзе бамбаваньне сэктара Газа ў адказ на беспрэцэдэнтныя атакі з боку ХАМАСа, у выніку якіх загінула каля 1300 ізраільцян, у асноўным мірных жыхароў.
Як піша «Голас Амэрыкі», Джо Байдэн ня думае, што на полі бою спатрэбіцца прысутнасьць амэрыканскіх вайскоўцаў, паколькі Ізраіль, паводле слоў прэзыдэнта, валодае адной з «найлепшых баявых сіл» у сьвеце, нават нягледзячы на тое, што амэрыканскія ваенныя караблі накіраваліся ў гэты рэгіён на фоне росту сутыкненьняў на паўночнай мяжы Ізраіля зь Лібанам.
Калі яго спыталі, ці лічыць ён, што ХАМАС павінен быць цалкам зьліквідаваны, Байдэн сказаў:
«Так, лічу. Але мусіць быць палестынская адміністрацыя. Павінен быць шлях да палестынскай дзяржавы», — сказаў ён падчас нядзельнага інтэрвію тэлеканалу CBS.
Прэзыдэнт папярэдзіў, што для Ізраіля было б памылкай акупаваць Газу, але «зьнішчэньне» «Хезбалы» і ХАМАСа, паводле яго, зьяўляецца «неабходным патрабаваньнем».
Міністар абароны ЗША Лойд Осцін абвясьціў аб разгортваньні другой авіяноснай групы позна ўвечары ў суботу, назваўшы гэта прыкметай «нашай рашучасьці стрымліваць любых дзяржаўных або недзяржаўных суб’ектаў, якія імкнуцца да эскаляцыі гэтай вайны».
«Іран — вострая тэма, але якую старанна пазьбягаюць, — расказала добра знаёмая з сытуацыяй крыніца ў адміністрацыі, — Авіяносцы суправаджаюць баявыя караблі і штурмавікі. Прыкладаюцца ўсе намаганьні, каб не дапусьціць перарастаньня гэтага канфлікту ў рэгіянальны».
Байдэн сказаў, што ягонае пасланьне Ірану заключаецца ў тым, каб не абвастраць канфлікт.
Міністар замежных спраў Ірана Хасейн Амірабдалахіян папярэдзіў у нядзелю, што яго краіна можа дзейнічаць, папярэдзіўшы ў інтэрвію «Аль-Джазіры» ізраільскіх чыноўнікаў, што «калі яны не спыняць свае зьверствы ў Газе, Іран ня можа проста заставацца назіральнікам».
«Калі маштабы вайны пашыраць, Амэрыцы таксама будзе нанесеная значная шкода», — сказаў ён.
Байдэн у інтэрвію CBS заявіў, што пагроза тэрарызму ў ЗША ўзрасла праз рост напружанасьці на Блізкім Усходзе. Аднак, паводле яго, ЗША могуць паклапаціцца аб войнах у Ізраілі і ва Ўкраіне і пры гэтым захаваць сваю «міжнародную абарону».
Гвалт на паўночнай мяжы Ізраілю ўжо нарастае. Лібанскія баевікі «Хезбалы», якія падтрымліваюцца Іранам, у нядзелю пачалі напады на пасады ізраільскага войска і вёскі на мяжы; Ізраіль адказаў ударамі па Лібане.
Саліван расказаў аб новым пакеце ўзбраеньняў для Ізраіля і Ўкраіны, кошт якога будзе «значна вышэйшы», чым раней заяўленыя 2 мільярды даляраў. Ён паведаміў CBS, што Байдэн плянуе правесьці перамовы аб пакеце на гэтым тыдні з Кангрэсам. Хуткае прыняцьце ўскладняецца пакуль што няўдалымі спробамі рэспубліканцаў выбраць новага сьпікера Палаты прадстаўнікоў.
Сэнатар-рэспубліканец Ліндсі Грэм заявіў у нядзелю, што ў найбліжэйшыя дні ён адправіцца ў рэгіён разам зь іншымі сэнатарамі, каб дамагчыся працягу перамоваў паміж Саудаўскай Арабіяй і Ізраілем.
Грэм заявіў, што мае намер прадставіць законапраект, які «дазволіць Злучаным Штатам ажыцьцяўляць удары сумесна з Ізраілем, каб выбіць Іран з нафтавага бізнэсу», калі Іран нападзе на Ізраіль.
Прадстаўнікі ўраду ЗША таксама заявілі, што яны мабілізуюцца, каб дапамагчы змякчыць гуманітарны крызіс у Газе, чакаючы жорсткага наземнага наступу.
Ізраільскія афіцыйныя асобы ясна далі зразумець, што гэтая кампанія ня будзе лёгкай і хуткай. Перад ім стаіць праблема, зьвязаная з тым, што дзясяткі закладнікаў, захопленых ХАМАСам 7 кастрычніка, зараз могуць утрымлівацца ў лябірынце падземных тунэляў, якія павінны быць расчышчаны ізраільскімі вайскоўцамі, каб зьнішчыць ХАМАС.
Байдэн у паведамленьні, апублікаваным у X, сказаў: «Мы не павінны выпускаць з-пад увагі той факт, што пераважная большасьць палестынцаў ня мелі ніякага дачыненьня да жудасных нападаў ХАМАСа і пакутуюць у выніку іх».
ЗША прызначылі былога пасла ў Турэччыне Дэвіда Сатэрфілда спэцыяльным пасланьнікам у гуманітарных пытаньнях на Блізкім Усходзе. Ягоная ўвага будзе засяроджана на «садзейнічаньні бясьпецы цывільных асоб», заявілі ў Дзярждэпартамэнце.
Дзяржсакратар Энтані Блінкен заявіў у нядзелю, што памежны пераход у Газу, які кантралюецца Эгіптам, будзе зноў адкрыты, і ЗША працуюць з Эгіптам, Ізраілем і Арганізацыяй Абʼяднаных Нацый, каб накіраваць паток уцекачоў праз гэты калідор.
Сотні тон гуманітарнай дапамогі зь некалькіх краін былі затрыманыя на Сынайскім паўвостраве ў Эгіпце на працягу некалькіх дзён у чаканьні пагадненьня аб іх бясьпечнай дастаўцы ў Газу і эвакуацыі ўладальнікаў замежных пашпартоў праз эгіпецкі КПП Рафіях, якія знаходзяцца ў Газе.
Саліван сказаў NBC:
«Дагэтуль мы не змаглі прапусьціць амэрыканскіх грамадзян праз памежны пераход, і я не ведаю, каб хтосьці яшчэ змог выехаць за гэты час».
Ён дадаў, што хоча пераканацца, што цывільнае насельніцтва, якое засталося ў Газе, мае доступ да ежы, вады і жыльля, і ў інтэрвію CNN сказаў, што ізраільскія афіцыйныя асобы нядаўна «зноў уключылі водаправод у паўднёвай частцы Газы».
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня менш за 260 удзельнікаў музычнага фэстывалю і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАС. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хэзбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне аб замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач сэктару Газа зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
- 15 студзеня 2025 году стала вядома пра пагадненьне пра спыненьне агню паміж Ізраілем і ХАМАС, якое павінна пачаць дзейнічаць з 19 студзеня. Ізраільскі бок выпусьціць некалькіх зьняволеных палестынскіх арабаў, а тэрарыстычная групоўка ізраільскіх закладнікаў.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
